Hadalka xoghayaha guud ayaa kusoo beegmaya iyadoo dalka dagaaladu
halakeeyeen ee Soomaaliya uu iminka u diyaar garoobayo koorsadii ugu horeysay
ee heer FIFA ah oo dalka lagu qabto tan iyo sanadku markuu ahaa 1986-kii.
Koorsadan oo ah mid lagu baranayo habka caruurta loogu bar baariyo kubada
cagta ayaa ah tii ugu horeysay oo nooceeda ah oo Soomaaliya ay ka hesho FIFA,
waxaana ay magaalada Muqdisho ka bilaaban doontaa 15-ka Bisha August ee inasoo
aadan, waxaana uu tababrkani imaanayaa kaddib markii ururka kubada cagta
aduunka ee FIFA uu xiriirka Soomaaliyeed u ogolaaday in uu tababarada uu FIFA
ka helo ku qabsado dalka Soomaaliya gudihiisa, sidaasi waxaa lagu sheegay war
saxaafadeed maanta oo khamiis ah kasoo baxay xafiiska xoghayaha guud ee
xiriirka Soomaaliyeed ee kubada cagta Mudane cabdi Qani Saciid Carab.
Xoghayaha guud Mudane Cabdi Qani Sacidi Carab waxaa uu war saxaafadeedkiisa
ku sheegay in tababarkan oo lagu qabto dalka Soomaaliya gudihiisa ay bilow
wanaagsan u tahay in shaqooyinka FIFA ee Soomaaliya la siiyo oo dhan in dalka
gudihiisa lagu qabto hada kaddib.
"In koorsadan lagu qabto magaalada Muqdisho waxaa ay noo leedahay
muhiimad aad u weyn, sababtoo ah waxaa ay u gogol xaareysaa in Soomaaliya ay hesho
xuquuqaha ay helaan xiriirada nala midka ah oo dalalkooda ku qabsada tababarada
FIFA siiso—waxaa ay taasi na gelineysaa rajo weyn waxaana ay farxad iyo reyreyn u tahay madaxda xiriirka Soomaaliyeed
ee kubada cagta iyo dhamaan bahweynta kubada cagta Soomaaliyeed”ayuu war
saxaafadeedkiisa ku sheegay xoghayaha guud Mudane Cabdi Qani Saciid Carab.
Dowlada Soomaaliya ayaa uga mahad celisay ururka FIFA in uu xiriirka Soomaaliyeed
ee kubada cagta u ogolaaday in tababaradii Soomaaliya la siin jiray loosoo
wareejiyo gudaha dalka Soomaaliya, iyadoo dowlada Soomaaliyeed ay sidoo kale
xiriirka Soomaaliyeed ee kubada cagta ku amaantay dadaalkii uu ku bixiyay in
koorsooyinka caalamiga ah ee Soomaaliya hesho gudihiisa lagu qabto.
Tababarkan oo noociisu yahay FIFA MA grassroots course, ayaa ka socon
doona magaalada Muqdisho inta u dhexeysa 15-19 August 2013, waxaana macalin ka
ah oo dhigi doona FIFA instructor Mr.
Ulric Mathiot oo u dhashay jasiirada Seychelles. Tababarkan ayaa noqonaya kii
sadexaad ee macalin Mr. Ulric Mathiot uu uqabto Soomaaliya tan iyo sanadkii
2009-kii.
Labadii tababar ee kan ka horeeyay waxaa Soomaaliya loogu qabtay dalka
Jabuuti sanadihii 2009-kii iyo 2011.
"Ulric Mathiot waa macalin ay jeceshahay Soomaaliya waxaana rajeyneynaa in
koorsooyinkeena mustaqbalkana uu isagu macalin nooga noqdo”ayuu yiri xoghayaha
guud ee Xiriirka Soomaaliyeed ee kubada cagta Mudane cabdi Qani Saciid Carab.
Qalabkii loogu talagalay in tababarkan lagu bixiyo waxaa uu soo gaaray
magaalada Muqdisho todobaadyo ka hor.
Koorsooyinka MA waa koorsooyin FIFA ay soo dirto oo keliya macalinka iyo qalabka
laakin kharaashaadka kale ee ku baxaya ay xiiriiradu iska bixiyaan, waxaana Soomaaliya
ay dhibaato ku qabi jirtay safarrada dibada ah oo kharash badani uga bixi jiray
xiriirka Soomaaliyeed.
Xoghayaha Guud ee xiriirka Soomaaliyeed ee kubada cagta Mudane Cabdi Qani
Saciid Carab wuxuu amaan balaaran usoo jeediyay dowlada, madaxada kubada cagta
iyo guud ahaan shacabka aanu walaalaha nahay ee Jabuuti oo uu sheegay in
Xiriirka Soomaaliyeed ay awood buuxda u siiyeen in uu tababarada FIFA iyo
cayaaraha Caalamiga ahba ku marti geliyo dalka Jabuuti iyadoo aanay jirin haba
yaraatee wax dal-tabyo ah.
"Dhowr iyo labaatankii sano ee lasoo dhaafay keliya maahan ee Jabuuti mar
kasta ayay noo ahayd Muqdisho 2-aad waligeena way noo ahaan doontaa”ayuu
xoghayaha guud Mudane Cabdi Qani Saciid Carab ku sheegay war saxaafadeed uu soo
saaray maanta oo Khamiis ah.
"In koorsooyinkeena aan ku qabsano dalka gudihiisa waxaa ay noo bad
baadineysaa kharash aad u farabadan oo
aan taa badalkeedana u isticmaali doono barnaamijyo kale oo horumarineed,
sababtoo ah USD 40,000 oo doolarka mareykanka ah ayaa nooga bixi jirtay koorso
kasta oo aan ku qabsano dalka Jabuuti, taas macnehedu waxaa uu yahay in isku
cel celis USD 120,000 oo doolar aan ku kharash gareynjirnay sanadkii markii aan
sadex koorso ku qabsano dalka Jabuuti lacagtaas oo ku bixi jirtay safarka iyo
hotelka ka qeyb galayaasha”ayuu yiri xoghayaha guud.
"Bal qiyaas kharashka noo baaqan karaya markii aan tababaradeena ku
qabsano dalka gudihiisa”ayuu hadalkiisa sii daba dhigay xoghayaha guud oo intaa
raaciyay in lacagahaas ay ka bixin jireen kharashka sanadkii xiriirku ka helo
FIFA, halka xiriirada kale ee dalalkooda wax ku qabsada ay heysteen fursad ay
kharashaadkaas ku baajiyaan.
Waxaa uu xoghayaha guud Mudane cabdi Qani Saciid Carab uu war
saxaafadeedkiisa ku sheegay in FIFA ay sanadkan Soomaaliya u ogolaatay 3 koorso
oo kala duwan kuwaas oo dhamaantood ka dhici doona caasimad dalka Soomaaliya ee
Muqdisho, taasoo xiriirka Soomaaliyeed gacan ka siin doonta horumarinta kubada cagta
ee uu wado, waxaana madaxda xiriirku ay balan qadeen in ay fursadan la helay si
weyn uga faa’iideysan doonaan iyadoo
lala kaashanayo dowlada Soomaaliya.
"Madaxda xiriirka Soomaaliyeed waxaa ay aad ugu kalsooni qabaan hadalkii
uu jeediyay madaxweynaha Soomaaliya Prof Xasan Sheekh Maxamuud ee uu ku sheegay
in dowladu ay gacan weyn siin doonto cid kasta oo ka qeyb qaadaneysa horumarinta
dalka gaar ahaana kubada cagta oo uu madaxweynuhu rumeysanyahay in ay tahay
aalada keliya oo loo adeegsan karo is dhex galka bulshada iyo horumarinta
dhalinyarada”ayuu yiri xoghayaha guud ee Xiriirka Soomaaliyeed ee kubada cagta
Mudane Cabdi Qani Saciid Carab.
Madaxweynaha Soomaaliya Prof Xasan Sheekh Maxamuud ayaa ku amaanay ururka
FIFA taageerada joogtada ah ee uu siinayay Soomaaliya xili dalku uu dhibaato
adag ku jiray taas oo horseed u noqotay in kubada cagta Soomaaliya ay sii
socoto. Waxaa madaxweynuhu uu sheegay in wax qabdkaas FIFA laga dareemayo
garoonka Kubada cagta Banaadir oo ururka FIFA uu dhisme ka wado, isagoo xusay
in uu ku rajo weynyahay in FIFA ay soo dhaqso usoo dhameys tirto qeybaha ka
harsan dhismaha garoonka.
Si kastaba ha ahaatee Talaabo weyn oo horay loo qaaday ayay u tahay
xiriirka Soomaaliyeed ee kubada cagta in
uu ku guuleysto codsigii uu dhawaan hor dhigay FIFA ee ku aadanaa in loo ogolaado tababaradiisa in uu
dalka gudihiisa ku qabsado maadaama xaalada amaan ee dalku ay soo wanaagsanaatay.
Ilaa iyo sadex tababar oo kala duwan oo midkiiba ay ka qeyb qaadanayaan
30 ruux ayaa sanadkan la siiyay Soomaaliya waxaana ay ka wada dhacayaan magaalada
caasimada ah ee Muqdisho.
Tabaradas ayaa kala ah tababarka
macalimiinta oo magaalda Muqdisho ka qabsoomi doona inta u dhexeysa 15 -19 August
2013, tababar dhanka caafimaadka ah oo isna Muqdisho lagu qaban doono 1-5
September 2013 iyo tababarka ugu dambeeya oo dhici doona inta u dhexeysa 12-16
September 2013.
Waa markii ugu horeysay ee Soomaaliya ay heso 3 tababr oo kala duwan
muddo laba bilood gudohood ah, waxaana taa fududeyneysa ogolaashaha xiriirka
Soomaliyeed loo ogolaaday in uu tababaradiisa ku qabsado dalka Soomaaliya
gudihiisa.
Somali Football Federation Media Department
Email:somalifootballmedia@gmail.com